NOBENAN LA PURISIMA

SÅNTA MARIAN KAMALEN
PATRONAN ISLAS MARIÅNAS

Matuna i ginasgås-mu,
Maria, Bithen yan Nåna,
sa’ nina’magof i Saina
nu’i gef fina’tinås-mu;

Hutungo’ i mina’gås-mu
ya hu sen nå’i hao på’gu
I anti, i minalago’
yan todu i guinahå-hu.
YANGGEN HÅGU PARA GUAHU,
GUAHU, NÅNA, PARA HÅGU.

NOBENAN La PURISIMA 

Åbe Maria Purisima.
Sin Pikådu Konsebida.
 

Fina’tinas Sinetsot:

Asaina Jesukristu, Rainon taichi’i mina’gås-mu, yan Yu’os na taihinekok minaolek-mu; mina’lak i Tata yan ininan i ginatbo-ña.  I mina’ huyong todu i guaha’ Jues, i mina’ fan libri i taotao siha, taiche’tan na Kinilu!  Na unsenguaiya i ginasgas, na unna’suha gi isao ayu i inayek-mu na Nanå-mu; maestro ni’ i hu hongge, kalan i ti lalache na Minagåhet:  Satbadot, anai mannanagga yu’ kalan ti hihokog na Mina’åse’; Yu’os ni’ i hugofli’e’ kalan i sentakkilo’ na Minaolek ni’i sen gofli’i’on!
Guahu lalaolao yo’ yanggen hu atitutuyi na hu atotga yo’ umisague hao.  Hu tungo’ i tailayen fina’tinas-hu; ya piniti yo’  sa’ hu isague hao.  Cha’mu chumåchanda, Asaina, ini i mañotsot na i’isao ni’i lumiheng gi papa’ i månton ayu i gåsgas na Bithen, nå’i enao i mandidok yan man li’e’an fanatan-mu ti manmañoda’ ni’ dididi’ na isao.

Ayu i senguaguan na Håga’ ni’i unchuda’ gi kilu’os anai un sague’ ham, ya un na’suha i sensåntos na Nanå-mu gi gineden i isao, na’ ma’ asi’i yo’, Minaolek-ku.  Na’gåsgas nu ayu ha’ i na’ma’åse’ na antihu ni’i minitong i isao, ya husina lumi’e’ i ina’paka’ enao i ungofli’e’ na Paluma.  Ya guahu, meton i hinaso-ku, ya hunå’i hao finihu nu’i hinilat i koranson-hu na pinite, na ti hu’isague hao ta’lo; yanggen unna’inayuda yo’ nu’i yini’usan na grasiå-mu.  Taiguenao mohon.

Matåyuyut I Espiritu Sånto

Nana’magof na Espiritu na ginen i Tata yan i Lahi-ña, kalan taichi’i na umaguaiyan-ñiha!  Ina i hinaso-ku; songge i hinalom-hu; ya hugeftuna yan huna’takkilo’ i senmå’gas na Asagua-mu, Nanan i Saina-hu as Jesukristu, si Sånta Maria, hunobenånayi yan huhahaso i misterion i tai’isao na Mama’potge’naihon-ña.  Taiguena mohon.

Matåyuyut Sånta Maria

Sengasgas hao, Bithen Maria, na hågu ha’ na maisa i guinaiya na Hagan Yu’os Tåta, sen Nanan i Lahi-ña, senmå’gas na Asaguan i Espiritu Sånto, lålala’ na saguan i Sinantusan Trinidåd.  Mandadaña ham gi me’nå-mu, ya inna’etnon i korason-måmi yan i korason-mu, intekukuni i dinangkulon Mina’gås-ña, insasangan i taichi’i na Sinantos-ña, in na’i gue’ nu’i ginefli’en-måmi, ya i tådodong na respetu intitina gue’ sa’ ninalibri hao gi fine’nana na isao, ya nina’bula hao grasia ayu anai mamapotge’ñaihon hao.

Manmalago’ ham ingepte hoa sen må’gas; ya ingagagao hao na unna’taka’ ham nu i magåhet na genefli’en Yu’os yan ayu i sensantos na pinto’-ña.  Taiguenao mohon.

Tinaitai gi Fine’nana na Ha’åne:

Sengasgas hao Bithen Maria, Sen nanan Yu’os, ni’i mamapotge’ñaihon tai’isao, bula gråsia, inegte nu’i tininas yan i fine’nana na tinai’isao; senmasåmai yan taiche’tan na unmiresi Numånan Yu’os.  Hågu, Asaina, gi Mamapotge’ñaihon-mu ayu i gos manana na machakchak i hasuyon na ha’ånen i gråsia, yan i matuna na sinilon i atdao i tininas ni’i dumudulalag i hinemhom i isao, ya chumochoma i anineng i finatai, ya hababa i fanhagman i langet.

Manmamagof ham, Asaina, nu’i tinakkilo’mu.  In gegepti på’go na ha’åne.  In tekukuni i sengasgas na Mama’potge’ñaihon-mu.  In sasangan na hågu sen masåmai hao yan tai’isao.  Manmamagof ham ya intitina lokkue’ i mansensantos na mañaina-mu as Joakin yan Åna; ya in na’tatakkilo’ i Sinantusan Trinidåd, sa’ sen nina’gåtbo hao guihi na ha’åne.

Ingagagao hao, sengasgas na Nåna, nu’i ginasgas i anten-måmi yan i minaolek i pennga-måmi pågu’, yanggen ha’ mañåsaga ham gi tano’, yan i finatai-måmi.  Taiguenao mohon.

På’go umataitai i Sensantos na
Korason Maria nu’i tres na Ninene ni’i manaiguini:

FINE’NENE NA NINENE
Hutuna hao, sengasgas na Korason Sånta Maria, tunåyon na sahguan i senguinaiya-ku as Jesukristu Yu’os Ostia; ya mamagof yo’ sa’ huli’e’ hao na nina’bula as Yu’os Tåta nu’i grasia siha ya nina’ Hagå-ña, ya sengatbo gi sengasgas na Mamapotge’ñaihon-mu.

Chålao, Nanan-måmi
I Abe Maria
Paopao na nina’en
I taotao-mu siha.

Si Yu’os unginegue Maria….
Umatuna I Tata….

MINA’ DOS NA NINENE

Hutuna hao, sengasgas na Korason Sånta Maria, tunåyon na sahguan i senguinaiya-ku as Jesukristu Yu’os Ostia; ya mamagof yo’ sa’ huli’e’ hao na nina’bula as Yu’os Lahi-ña nu’i gråsia siha ya nina’ Nanå-ña, ya sengatbo gi sengasgas na Mamapotge’ñaihon-mu.

Chålao, Nanan-måmi
I Åbe Maria
Paopao na nina’en
I taotao-mu siha.

Si Yu’os unginegue Maria….
Umatuna i Tata….

MINA’ TRES NA NINENE
Hutuna hao, sengasgas na Korason Sånta Maria, tunåyon na sahguan i senguinaiya-ku as Jesukristu Yu’os Ostia; ya mamagof yo’ sa’ huli’e’ hao na nina’bula as Yu’os Espiritu Sånto nu’i gråsia siha ya nina’ Nanå-ña, ya sengatbo gi sengasgas na Mamapotge’ñaihon-mu.

Chålao, Nanan-måmi
I Åbe Maria
Paopao na nina’en
I taotao-mu siha.

Si Yu’os unginegue Maria….
Umatuna i Tata….

Tinayuyut

Sengasgas hao, Bithen Maria, magåhet na Nanan Jesus yan i Sånta Iglesia, ya gi Minagåhet yan misterion i Sengasgas na Mamapotge’naihon-mu, Patronan ini na tåno’.  I sen na’magof na misterion i taiche’tan na mamapotge’naihon-mu, mina’ intatayuyut hao na un atan ham nu’i yo’ase’ na fanatan-mu; ya infanagofli’e’ ham ni’ i famagu’o-mu nu’i ti hihokog na ginefli’e’, in dadalalak, anha’ manlåla’la’ ham i manmatågo’-måmi, ya un hagu’i ham nu’i ingagagao hao, yan i gråsian i umaolek finatai-måmi.  Taiguenao mohon. 

Mina’ Dos Na Ha’åne
Sengasgas hao, Bithen Maria, Rainan i anghet siha, na mamapotge’-ñaihon ma’ogte gråsia yan mana’takkilo’-ña ke i Serafin siha, ya kalan gualåfon na pulan bula minaolek; na manå’i hao ni’ manana para unatan ha’ si Yu’os yan I HINENGGE, ya guenao na gråsia takkilo’-ña hao ke i manakkilo’ na Serafin siha, sa’ kabales-ña i hinengge-mu ke i hinenggen-ñiha; sa achogha mamaigo’ hao, makmåmata ha’ i korason-mu.
Manmamagof ham, Asaina, nu’i tinakkilo’-mu.  Ingegepte på’go na ha’åne. Intitina i taiche’tan na Mamapotge’-ñaihon-mu.  Manmamagof ham ya intitina lokkue’ i mansensantos na mañaina-mu as Hakin yan Åna.  In na’tatakkilo’ i Sinantusan Trinidåd, sa’ sen nina’ gåtbo hao guihi na ha’åne.  In gagagao hao na unhagu’e ham nu’i fehmaman na Hinengge nu’i inatan as Yu’os guini gi tano’, ya inli’e’ gi langet.  Taiguenao mohon.
På’go u mataitai i Ninene siha taiguihi gi fine’nana na ha’åne.

Mina’ Tres Na Ha’åne
Sengasgas hao, Bithen Maria, Rainan i Patriatka siha, ni’i mamapotge’-naihon tai’isao, inadotna nu’I bittut MANNANGGA, ni’i untatanganaya na ugaigi ha’ si Yu’os giya hagu, na ginen ayu ha’ annai untutuhon hao huma’ane gagaige hao giya guiya put grasia; ya sa guaha giya hagu enao na ninangga, unmeresi na uguse magi gi tano’, yan i mineton i ginigue-mu nu hami.

Manmamagof ham, Asaina, nu’i tinakkilo-mu:  ingegepte pågo na ha’åne i Mamapotge’-ñaihon-mu.  Insasangan na hågu sengåtbo hao yan tai’isao.  Manmamagof ham ya intitina lokkue’ i sensantos na mañaina-mu as Hakin yan Åna.  In na’tatakkilo’ i Sinantusan Trinidåd sa’ sen nina’ gåtbo hao guihi na ha’åne.  In gagagao hao, sengasgas na Nåna, ninangga; ya inangongoko i ilekña si Yu’os na unnå’i ham, u’iyon-måmi gi langet.  Taiguenao mohon.
(På’go u mataitai i Ninene siha taiguihi gi fine’nana na ha’åne.)

Mina’ Kuatro Na Ha’åne
Sengasgas hao, Bithen Maria, Rainan i Profeta siha, ni’i mamapotge’-naihon tai’isao, inadotna nu’i manmaolek na pennga siha, na linesgue hao nu’i GINEFLI’E’ YU’OS; na ayuha’ annai untutuhon huma’åne, hana’chilong i korason-mu yan i korason Yu’os, ya nina’ ma’lag-ña ke yanggen mandaña’ i Manserafin yan i Mañåntos gi langet.
          Mamamagof ham, Asaina, nu’i tinakkilo’-mu.  Ingegepte på’go na ha’åne ya intekukune i taiche’tan na Mamapotge’-naihon-mu.  Insasangan na hågu sengåtbo hao yan tai’isao.  Manmamagof ham ya intitina lokkue’ i sensantos na manaina-mu as Hakin yan Åna.  In na’tatakkilo’ i Sinantusan Trinidåd sa’ sen nina’ gåtbo hao guihi na ha’åne.  In gagagao hao, sengasgas na Nåna yan Nanan i yini’usan ginefli’e’, na unna’nina’ye i korason-måmi nu enao na ginefli’e’, ya ufansinengge nu enao na guafen långet guini gi tano’, ufanmañiñila’ ha gi langet gi manaihinekog na ha’åne.  Taiguenao mohon.
(På’go u mataitai i Ninene siha taiguihi gi fine’nana na ha’åne.)

MINA’ SINKO NA HA’ÅN
Sengasgas hao, Bithen Maria, Rainan i Apostules siha, ni’ i mamapotge’ñaihon tai’isao.  Inadotna nu i todu i manmaolek na pennga, ya kololoña nu i TINEMTOM, ya un sina fuma’tinas i palu siha na bittut yan i dinanche na ginehen i Sånta Iglesia.  In sasangan hao, Asaina, na sentomtom hao na Bithen gi misterion Nånan Yu’os ha’ yan i Sånta Iglesia yan Sainan todu siha i nina’huyong Yu’os.
Manmamagof ham, Asaina, nu i tinakkilo’-mu.  Ingegepte i taichetan na Mamapotge’-ñaihon-mu.  Isasangan na hågu sengatbo hao yan tai’isao.  Manmamagof ham yan intitina lokkue’ i sensantos na mañaina-mu as Hakin yan Åna.  Ina’tatakkilo’ i Sinantusan Trinidad; ya ingagagao hao na unfåkkai ham nu i tinemtom, ya inna’tunas i pinekat-måmi taimanu ha’  i malago’ Yu’os.  Taiguenao mohon.
(På’gu umataitai i Ninene siha taigui gi fine’nana na ha’åne.)

MINA’ SAIS NA HA’ÅNE
Sengasgas hao, Bithen Maria, ma’lak na Rainan i Manmåttit siha, ni’ i mamapotge’-naihon tai’isao; inadotna nu todu i manmaolek na pennga na mangaga’chong ha’ yan i TININAS ni’ i muna’tunas yan muna’kabåles i che’cho’ siha anai låla’la’ hao guini gi tano’, na haguaiya-ña si Yu’os ke todu i santos na hinanao i manunas.  
Manmamagof ham, Asaina, nu i tinakkilo’-mu.  Ingegepte i taiche’tan na Mamapotge’-ñaihom-mu.  In sasangan na hågu sen gåtbo hao yan tai’isao.  Manmamagof ham ya intitina lokkue i sensantos na mañaina-mu as Hakin yan Åna. In na’tatakkilo’ i Sinantusan Trinidåd sa’ sen nina’ gatbo hao guini na Minagåhet Hinengge.  In gagagao hao sengasgas na Nåna na un hagu’e ham nu i tininas ni’ i un na’fanunas ham på’go yan asta ke manmåtai-hami.  Taiguenao mohon.
(På’gu umataitai i Ninene siha taigui gi fine’nana na ha’åne.)

MINA’ SIETE NA HA’ÅNE
          Sengasgas hao, Bithen Maria, Rainan i Konfesot siha, ni’ i mamapotge’-ñaihon tai’isao; yan gi minaolek i tinai’isao,   inadotna nu todu i bittut siha yan dinidok nu i MINATATNGA ya un siña chumo’gue senkabåles, un å’ñao siha i manganite, ya un yamak i ilun i kulebbla ni’ i dumagi si Eba gi Para’isu; sa’ enao na takkilo cho’cho’ mina hagas ha’ inayek hao as Yu’os.

Manmamagof ham, Asaina, nu i tinakkilo’-mu.  Ingegepte i taiche’tan na Mamapotge’-ñaihon-mu.  In sasangan na hågu sen gåtbo hao yan tai’isao.  Manmamagof ham ya intitina lokkue’ i sensantos na mañiana-mu as Hakin yan Åna.  In na’ tatakkilo’ i Sinantusan Trinidad, sa’ sen nina’gåtbo hao guihi na ha’åne’.  Ingagagao hao, sengasgas na Bithen na unfåkkai ham nu i  minatatnganga-mu, ya in fa’tinas taiguihi i fina’tinås-mu, ya in a’ñao i acha’ot-måmi siha yan i finatai-måmi.  Taiguenao mohon. 
(På’gu umataitai i Ninene siha taigui gi fine’nana na ha’åne.)

MINA’ OCHO NA HA’ÅNE 
Sengasgas hao, Bithen Maria, Rainan i Manbithen, ni’ i mama’potge’-ñaihon tai’isao, inadotna nu i todu siha i manmaolek na pennga yan bittut na mana’fanetnon gi senmasåmai na BINITHEN-MU , sa’ un nånan i lilah’yan i bithen siha na mansengasgasna asaguan i Bithen as Jesukristo i Lahi-mu na Sensantos; ya nina’ takkilo’ lokkue’ i bittut I TENPLANSA.

Manmamagof ham, Asaina, nu i tinakkilo’mu.  Ingegepte i taiche’tan na Mamapotge’-ñaihon-mu; insasangan na hågu sengatbo hao yan tai’isao.  Manmamagof ham ya intitina lokkue’ i sensantos na mañaina-mu as Hakin yan Åna. In na’tatakkilo’ i Sinantusan Trinidad sa’ sen nina’ gatbo hao guihi na ha’åne.  Ya in gagagao hao na un fåkkai ham nu enao na bittut, ya cha’-måmi dumidiles i ma’usan i sentido siha gi tataotao, lao maolek-ña insa’pet yan inche’ma siha taiguihi i fina’tinås-mu.  Taiguenao mohon.
(På’gu umataitai i Ninene siha taigui gi fine’nana na ha’åne.)

MINA’ NUEBI NA HA’ÅNE
Sengasgas hao, Bithen Maria, Rainan i Manantos, ni i mamapotge’-ñaihon tai’isao, ya ma’ote-na sinantos ke todu siha yanggen mandaña; mangef agofli’e’ yan si Yu’os; manå’i na u bittut nina’in Yu’os, yan i maña’sasange ha’ gi Mamapotge’-naihon-mu.
          Manmamagof ham, Asaina, nu i tinakkilo’-mu.  In sasangan na hågu sengatbo hao yan tai’isao.  Manmamagof ham ya intitina lokkue’ i sensåntos na mañaina-mu as Hakin yan Åna.  In na’tatakkilo’ i Sinantusan Trinidåd sa’ sen nina’gåtbo hao guihi na ha’åne.  Ingagagao hao na un na’fanmesngon ham gi senfehman na maguaiyan i tailamen na Mamapotge’-ñaihon-mu, ya in gepte hao gi langet.  Taiguenao mohon.
(På’gu umataitai i Ninene siha taigui gi fine’nana na ha’åne.)