I KANTAN TÅTAN ENRIQUE SIHA

ESTE I TANO'
Este i tano bulan minagof,
dåndan, baila yan kånta.
I espot yan i salåpe'
enåo ha' tinangångå-ña.

Alakapu ting, ting,ting, ting,
Sumen tåya' bali-ña
Alakapu ting, ting,ting, ting,
Sumen tåya' bali-ña.

Ekahåti i pinikåt-mu
Moh'na yanggen sigi un gacha'.
Sa' u lachi i patås-mu
Ya i tinailaye un fakcha'.

Alakapu ting, ting,ting, ting,
Sumen tåya' bali-ña.
Alakapu ting, ting,ting, ting,
Sumen tåya' bali-ña.

Tinige' Enrique Paulino Naputi
(March 27, 1888 - July 05, 1970 ~ R.I.P.)

HÅFA GUAHA GI HALOM TÅNO'
Håfa guaha gi halom tåno' Guam na isla?
Niyok, dokdok, fadang, lemmai, gaddo' guinahå-ña.
Ginen este siha na produkto
Man libiåno åntes siha i tåotåo-ña.

Niyok, niyok na guinahan Guam na isla
Sumen dångkolo balin-ña
Todus klåsi siña un fa'tinas
Desdi i hale' esta i hagon-ña.
 Tinige' Enrique Paulino Naputi  (March 27, 1888 - July 05, 1970 ~ R.I.P.)

TINAYUYUT HA’ÅNE
Asaina, nå’i yu’ nu i bendision-mu, ya hufa’tinas ini na cho’cho’ sa’ un-nina’magof ya u nina’måolek i anti-hu.  Jesus-hu, gai’ase’ nu guåhu.  O sen mames, Jesus-hu, cha’mu fanhuhusga nu guåhu; låo na’ safo’ yu’.

Korason i gofli’e’on na Satbadot-hu, na’ fañila’ ya un na’lafeh’man giya guåhu i ginefli’e-hu nu hågu. Jesus, na' mames yan umitde i Korason-mu, na’aya i Korason-mu yan
i korason-hu.

TINAYUYUT I U FANEYAK
Asaina, guåhu ni’ i sensala’on na tentago’-mu, ti humiresi ni håfa na måolek. Malago’ yu’ humålom ya hu li’e’ i guinahå-mu siha. Na’ magof ni’ un na’hålom yu’, achokha sen ti humiresi, ya nå’i yu’ guini siha finihu yan såntos na tinaitai na hugofli’e’ håo håfa taimano ha’ i tiningo’-hu nu hågu. Sa’ ti hukeketungo håo yanggen ti para hu gofli’e’ håo, Asaina Yu’os, na hågu yu’ muna’ huyong. Taiguenåo mohon.